Ұстаз – жүректен жол тапқан шырақшы... Сәулелі сана мен сырлы әлемнің кілтін ұстатқан,

Қарапайым сөзбен – ғұмыр, жүрекпен – шам жаққан ұстаздар,

Сіздерді бүгінгі Ұстаздар күнімен айрықша құрметпен құттықтаймын!

Сіз – бала қиялына қанат бітірген,

Жұлдыздай жарық, гүлдей нәзік, шынардай биік тұлғасыз.

Қалам мен парақтан ғажайып дүние жасаған,

Әр әріпке үміт, әр сөзге жүрек сыйғызған шеберсіз.

Сіз көрсеткен жол – тек білімге емес,

Адамдыққа, парасатқа, мейірімге апарар дара соқпақ.

Күздің алтын бояуларымен келетін бұл мереке –

Сіздің еңбегіңізге тағзым,

Сіздің мейіріміңізге бас иетін күн.

Жанарыңызда – от сөнбесін,

Жүрегіңізде – үміт өшпесін.

Шәкірттеріңіз – самғаған сұңқар,

Еңбегіңіз – мәңгі өлмес шежіре болсын!

Ұстаз күні құтты болсын!

Мерекелік іс-шараның мақсаты:

Ұстаз еңбегін бағалау: Мұғалімдердің білім беру саласындағы өлшеусіз еңбегіне алғыс білдіру, олардың жас ұрпақты тәрбиелеудегі, ел болашағын қалыптастырудағы рөлін насихаттау, қоғамда ұстаз мәртебесін көтеру арқылы білім саласына деген құрметті арттыру.

Құрмет пен тағзым: Оқушылардың ұстазға деген шынайы сыйластық, құрмет сезімдерін қалыптастыру, олардың еңбегін бағалай білуге үйрету, ұстаз алдындағы жауапкершілік пен тағзымды санаға сіңіру.

Тәрбиелік бағыт: Жастарды мұғалім еңбегін қадірлеуге, оларға алғыс айту мәдениетіне тәрбиелеу, ұстаздың әрбір сөзі мен ісінен үлгі алуға баулу, ұстаз бен оқушы арасындағы рухани байланысты нығайту арқылы адамгершілікке, ізгілікке баулу.

Шығармашылық дамыту: Оқушылардың өнерге, сөйлеу мәдениетіне, сахнада өзін ұстауға деген қабілетін дамыту.

Ұрпақтар сабақтастығы: Ардагер ұстаздарды құттықтау, жас мұғалімдерге шабыт беру.

Осы мақсатта ұстаздарға мерекелік көңіл-күй сыйлаған 4,11 сынып оқушыларына алғыс білдіреміз.