15 ақпан – Ауған соғысы ардагерлер күніне орай  «Ауғанстан жүректегі жара»

17 ақпан күні мектеп қабырғасында ерекше де тағылымы мол іс-шара — Ауған соғысы ардагерлерімен кездесу кеші ұйымдастырылды. 

Кездесудің басты мақсаты – Отан үшін от кешкен ерлерді ұлықтау, олардың ерлігін жас ұрпақтың жадында жаңғырту және оқушылардың бойында отансүйгіштік рух қалыптастыру болды.

Кешке Жамбыл облысының Интернационалист - жауынгерлер одағы қоғамдық бірлестігі төрағасының орынбасары Төртбаев Марат Әсілбекұлы мен бірлестік мүшесі Сертеков Жеңіс Шалқарбекұлы арнайы шақырылып, оқушылармен мазмұнды сұхбат құрды. Мектеп директоры С.Ботамкулова ардагерлерге құрмет білдіріп, олардың ел үшін жасаған жанқияр ерліктері ұрпақ жүрегінде мәңгі сақталатынын атап өтті.

Ардагерлер өз сөздерінде Ауған жеріндегі ауыр кезеңдерден сыр шертіп, бастан өткерген оқиғаларын тебіреніспен жеткізді. Олардың әңгімелері жас буынға батылдық пен қайсарлықтың, достық пен адалдықтың шынайы үлгісін көрсетті.

Іс-шара барысында оқушылар Ауған соғысы тақырыбына арналған патриоттық әндер мен музыкалық композициялар орындап, кештің әсерін тереңдете түсті. Ән шумақтарынан туған жерге деген сүйіспеншілік, Отан қорғаушыларға деген шексіз құрмет және ел болашағына деген сенім айқын сезілді.

Бұл кездесу – өткенге тағзым, ерлікке құрмет, ал болашаққа – берік сенім ұялатқан тағылымды кеш болды.

Ұйымдастырған: АӘД пән мұғалімі Қ.Х.Ноғайбаев, педагог-ұйымдастырушы Э.Т.Буканбаева