«Әке – ұрпақ тәрбиесінің үлгісі» әкелер құрылтайы

«Әке – балаға сыншы», «Әке көрген оқ жонар» деген дана халқымыздың сөздері әкенің қоғамдағы, отбасыдағы айрықша орнын айқын көрсетеді. Әке – отбасының тірегі ғана емес, баланың өмір жолындағы ең алғашқы ұстазы, бағыт-бағдар беруші шамшырағы. Оның әрбір ісі, айтқан ақылы мен көрсеткен өнегесі баланың бойына өмірлік құндылық болып сіңеді.

Іс-шара барысында Тараз қаласы «Жібек жолы» ауданы әкімі аппаратының ұйымдастыру жұмысы және құқықтық қамтамасыз ету бөлімшесінің бас инспекторы Сәкен Нұрмаханұлы әке тақырыбына қатысты терең ойлы, тағылымы мол пікірлерімен бөлісті. Ол әкенің отбасы өміріндегі орны, бала тәрбиесіндегі жауапкершілігі мен өнегелі рөлі жайында сөз қозғап, ұлттық құндылықтар мен адамгершілік қағидаттардың маңыздылығын ерекше атап өтті. Сонымен қатар, әке — отбасының тірегі, баланың өмірлік бағдарын айқындайтын басты тұлға екенін айта келе, өз ойларын өмірден алынған мысалдармен әсерлі жеткізді. Оның мазмұнды баяндамасы қатысушыларға терең ой салып, тәрбиелік мәні зор әсер қалдырды.

Әкенің мейірімі мен талапшылдығы, жауапкершілігі мен парасаты баланың тұлға болып қалыптасуында шешуші рөл атқарады. Әке баласына адалдықты, еңбекқорлықты, батылдық пен табандылықты өз іс-әрекеті арқылы үйретеді. 

Отбасындағы әкенің беделі – тәрбие негізі, ал оның өнегесі – ұрпаққа мирас.

Бүгінгі құрылтайдың басты мақсаты – әкенің бала тәрбиесіндегі жауапкершілігін арттыру, мектеп пен отбасы арасындағы ынтымақтастықты нығайту, ұлттық тәрбие мен отбасылық құндылықтарды ұлықтау. Әкелердің мектеп өміріне белсенді араласуы – саналы, тәрбиелі, елін сүйетін ұрпақ тәрбиелеудің маңызды кепілі.

Әке – ұрпақтың рухани тірегі, ел болашағының негізін қалаушы. 

Саналы әке – саналы ұрпақтың бастауы.