«Қуанышқа толы көрісу» челленджі

14 наурыз – Көрісу күні – қазақ халқының ежелден келе жатқан ерекше дәстүрлі мерекелерінің бірі. 

Көрісу күні – адамдардың бір-бірімен қауышып, амандық-саулық сұрасып, өкпе-ренішті ұмытып, жаңа жылды жақсылықпен қарсы алуға ниет білдіретін күн.

Бұл мерекенің басты мәні – адамдар арасындағы татулықты, сыйластықты және бауырмалдықты нығайту. 

Қыстың ұзақ күндерінен кейін халық бір-бірінің үйіне барып: «Бір жасыңмен!», «Жасың құтты болсын!» деп құшақтасып көріседі. Жастар үлкендерге сәлем беріп, батасын алады. Үлкендер ақ тілегін айтып, елге амандық, береке тілейді. Осылайша Көрісу күні адамдарды жақындастырып, қоғамдағы бірлікті арттыратын маңызды рухани құндылыққа айналған.

Көрісу күнінің тағы бір мақсаты – адамдарды мейірімділікке, кешірімділікке және құрметке тәрбиелеу. Бұл күні бұрынғы өкпе-наз ұмытылып, адамдар таза көңілмен қауышады. Дәстүр бойынша әр шаңырақ қонақ күтіп, дастарқан жайып, келген жанға құрмет көрсетеді. Бұл – қазақ халқының қонақжайлығы мен кең пейілінің айқын көрінісі.

14 наурыз – тек амандасу күні ғана емес, адам жүрегін жақындастыратын, ұлттық дәстүрді жаңғыртатын, ізгілік пен бірлікті дәріптейтін ерекше мереке. Ол халықтың рухани байлығын танытып, ұрпаққа татулық пен сыйластықтың қадірін ұғындырады.